Tövsiyə edirik ki, işəgötürənlər əmək qanunvericiliyinin 3 günlük müddət tələbinə ciddi yanaşsınlar. Çünki Əmək Məcəlləsinin 140-cı maddəsinin 6-cı hissəsində qeyd edilir ki, əmək müqaviləsində, kollektiv müqavilədə başqa hal nəzərdə tutulmayıbsa, məzuniyyət vaxtı üçün orta əmək haqqı müəyyən səbəbdən məzuniyyət başlanandan sonra ödənilmişdirsə, işçinin tələbi ilə məzuniyyətin başlanma vaxtı əmək haqqının faktiki olaraq verildiyi gündən hesablanıla bilər.
Misal. “A” MMC-nin işçisi 10 oktyabr 2019-cu il tarixdən 10 günlük əmək məzuniyyətinə çıxıb. İşəgötürən işçilərin yarım aylıq əmək haqlarını 15 oktyabr 2019-cu il tarixdə ödədiyi üçün qərara alır ki, əmək məzuniyyətinə gedən işçiyə də ödənişi həmin tarixdə etsin. İşçinin 10 oktyabr 2019-cu il tarixdə əmək məzuniyyətinə çıxmasına baxmayaraq, o iddia qaldıra bilər ki, məzuniyyətin başlanma tarixi ödəniş olan tarixdən, yəni 15 oktyabr 2019-cu ildən hesablanılsın.