Müddətli əmək müqaviləsi hansı hallarda növbəti müddətə qədər artırılmış hesab olunur?

"Əməyin uçotu: A-dan Z-yə" kitabından seçmə

Müddətli əmək müqaviləsinin növbəti dövrə qədər artırılması prossesi da təzadlıdır. Əmək Məcəlləsinin 73-cü maddəsinə əsasən, müddətli əmək müqaviləsində göstərilən müddət qurtardıqda əmək münasibətləri davam etdirilərsə və müddət bitdikdən sonrakı bir həftə ərzində tərəflərdən heç biri müqaviləyə xitam verilməsini tələb etmirsə, həmin əmək müqaviləsi əvvəl müəyyən olunmuş müddətə uzadılmış hesab olunur.

Misal: Tikinti sahəsində fəaliyyət göstərən “A” MMC-nin fəhlə vəzifəsində çalışan işçi Quliyev Arzu ilə bağlanan 2 illik müddətli əmək müqaviləsi 15 avqust 2019-cu il tarixdə bitir. İşəgötürən hər hansı səbəbdən unutqanlıq edərək 15 avqust 2019-cu ildə başa çatan əmək müqaviləsi davam etdirilməməsi haqqında işçini məlumatlandırmayıb. Əgər işçi 22 avqust 2019-cu il tarixə kimi işinə davam edibsə və tərəflər bir-birini müqavilənin bitməsi ilə bağlı xəbərdar etməyibsə, bu zaman əmək müqaviləsi iki il müddətinə üzadılmış hesab olunur. Artıq işəgötürən 25 avqust tarixində işçi xəbərdar etsə də, işçinin əmək müqaviləsi qeyd edilən müddətə artmış hesab olunacaq. Bu zaman müəssisənin tikinti ilə bağlı iş fəaliyyətinin başa çatdığı halda, həmin işçinin 2 illik müddətinə əmək müqaviləsi aktiv qalmalıdır.

Bir məsələni də qeyd edək ki, bölmənin əvvəlində  qeyd etdiyimiz kimi, əmək müqaviləsinin müddəti fasiləsiz olaraq 5 il müddətdən çox olduğu halda əmək müqaviləsi müddətsiz hesab olunur. O səbəbdən də, 5 il müddəti bitdikdən sonra tərəflərin hər hansı xəbərdarlıq edilməsinə ehtiyac olmur.